Presidenti i Paris Saint-Germain Nasser Al-Khelaifi thuhet se ka luajtur një rol të rëndësishëm në ofertën e propozuar të Sheikh Jassim bin Hamad Al Thani për të blerë Manchester United.

Miliarderi nga Katari ka qenë një nga favoritët kryesorë për të përfunduar një blerje të klubit nga Old Trafford që kur Glazers konfirmuan qëllimin e tyre për të shitur atë në janar.

Ai ka paraqitur një sërë ofertash për të arritur një marrëveshje, por përballet me konkurrencë të ashpër nga pronari i INEOS, Sir Jim Ratcliffe.

Megjithatë, sipas The Athletic, si pjesë e ofertës së tij për të blerë United, skuadra e Jassim fillimisht u konsultua me Al-Khelaifi për këshilla mbi vlerësimin e United, pasi Glazers donin shtatë miliardë euro për klubin.

Jassim paraqiti një ofertë të pestë dhe të fundit për United në fillim të kësaj jave, e cila do të mbetet në tryezë edhe pas afatit të së premtes.

Por, Al-Khelaifi i PSG-së, i cili ka vepruar në një rol këshillues për ofertën e Sheikh Jassim, është takuar me Glazers dhe Raine Group.

Glazers kanë kontaktuar Al-Khelaifi në një përpjekje për të bindur Jassim për të rritur ofertën e tij, e cila mund të jetë më afër asaj që pronarët aktualë të United kërkojnë.

Oferta e pestë e Jassim besohet të jetë rreth 5 miliardë euro. Oferta është për të gjithë klubin, ku përfshihen aksionet e zotëruara nga aksionarë të ndryshëm minoritarë.

Ndërkohë, oferta e Ratcliffe e vlerëson klubin pak më lart, por propozimi i tij do të linte disa ose të gjithë gjashtë vëllezërit e motrat Glazer si aksionarë të pakicës. /Telegrafi/